അരിപ്പൊടി, തേങ്ങാപ്പാല്, പഞ്ചസാര എന്നിവ ചേര്ത്തുണ്ടാക്കുന്ന മാപ്പിള മധുര പലഹാരം ആണ് കിണ്ണത്തപ്പം. പലപ്പോഴും ഏലത്തരിയും റോസ് വാട്ടറും ചേര്ക്കാറുണ്ട്. പ്രത്യേക മണവും രുചിയും ലഭിക്കുന്നതിനാണ് ഇവ ചേര്ക്കുക. ഈദ് ആഘോഷം തുടങ്ങിയ പ്രത്യേക ഉല്സവ സമയങ്ങളില് ഉണ്ടാക്കുന്ന മധുരമാണ് മീഠാപൊരി. ഏലത്തരി ചേര്ത്ത് ഉരുക്കിയ ശര്ക്കര പാനിയില് ഇട്ട വറുത്ത പൊരിയാണ് ഇത്. ശര്ക്കര പാനിയില് പൊതിയുന്നതോടെ ഈ വറുത്ത പൊരിക്ക് നല്ല സ്വാദും മണവും ലഭിക്കുന്നു. ഒപ്പം വായില് ഞെരിയുന്ന സുഖവും. പഴം പൊരിയാണ് ഏറെ പ്രചാരം ലഭിച്ച മറ്റൊരു മധുര പലഹാരം, നല്ല പഴുത്ത നേന്ത്രപ്പഴം നീളത്തില് കീറി പഞ്ചസാരയോ ശര്ക്കരപാനിയോ ചേര്ത്ത അരിമാവില് മുക്കി വറുത്തെടുക്കുന്നതാണ് എല്ലാവരും ഇഷ്ടപ്പെടുന്ന ഈ മധുരം.
