காசர்கோடு

காசர்கோட்டில் கயாக்கிங் மற்றும் கனோயிங் (சிறுபடகோட்டம்) ஆகியவை வேகம் அதிகமின்றி அமைதியாக மேற்கொள்ளப்படுகின்றன. இது தண்ணீரில் வேகமாகச் செல்வதையோ அல்லது எல்லைக்கோடுகளைப் பரிசோதிப்பதையோ நோக்கமாகக் கொண்டதல்ல. மாறாக இது, இயற்கை நிலத்தோற்றங்கள் பயணத்தின் வேகத்தைத் தீர்மானிக்கின்ற அலையாத்திக் காடுகள் சூழ்ந்த நீர்வழிகள், அமைதியான காயல்கள் ஆகியவற்றின் வழியாக மேற்கொள்ளப்படும். இந்த அனுபவம் மென்மையானதாகவும், உறுதியானதாகவும், இயற்கையோடு ஆழ்ந்து ஒன்றியதாகவும் இருப்பதால் பரபரப்பை விட உற்றுநோக்குதலை விரும்புபவர்களுக்கு இது மிகவும் ஏற்றதாக அமைகிறது.

அலையாத்திக் காடுகள் நிறைந்த சூழல் காசர்கோடு பகுதியைத் தனித்துவமானதாக ஆக்குகிறது. இங்குள்ள நீர்வழித் தடங்கள் பொதுவாகக் குறுகலானதாகவும், பாதுகாப்பானதாகவும், பலத்த காற்றிலிருந்தும் நீரோட்டங்களில் இருந்தும் இயற்கையாகப் பாதுகாக்கப்பட்டதாகவும் உள்ளது. நீங்கள் துடுப்பு வலித்து முன்னோக்கிச் செல்லும்போது நீர் அமைதியாக இருக்கின்றது, பெரும்பாலும் அலையாத்தித் தாவரங்களின் வேர்கள், வளைந்து தொங்கும் கிளைகள், மேலேயுள்ள வானம் ஆகியவற்றை ஒரு கண்ணாடி போலத் தன் மேற்பரப்பில் பிரதிபலிக்கிறது. இயக்கம் மிகக் குறைவாகவும், கட்டுப்படுத்தப்பட்டதாகவும் இருப்பதால் துடுப்புப் போடுபவர்கள் இடைவிடாமல் முயற்சிக்காமலேயே தடங்கலின்றி சறுக்கிச் செல்ல முடிகிறது. இது தியானம் போன்ற ஓர் அனுபவத்தை உருவாக்குகிறது, ஒவ்வொரு துடுப்பு வலித்தலுக்கும் இடையே அமைதி நிலவுகிறது. பறவைகளின் ஒலியாலோ அல்லது கயாக் மீது மோதும்போது நீர் எழுப்பும் மெல்லிய ஓசையாலோ மட்டுமே அந்த அமைதி கலைகிறது.

காசர்கோட்டில் உள்ள கயாக் வழித்தடங்கள் குறிப்பாக இயற்கை ஆர்வலர்களைக் கவர்வதாக உள்ளன. அலையாத்திக் காடுகள் மீன்களுக்கான இனப்பெருக்கத் தலமாகவும், பறவைகள், நண்டுகள், பிற சிறிய வன உயிரிகள் ஆகியவற்றுக்கு வாழிடமாகவும் விளங்குகின்றன. நீருக்கு அருகில் தாழ்வாக அமர்ந்திருக்கும் பறவைகள் அல்லது நீர்ப்பரப்புக்கு அடியில் மீன்கள் நகர்வதால் ஏற்படும் சிற்றலைகள் ஆகிய காட்சிகளை நாம் இங்கு சாதாரணமாகக் காண முடியும். வழித்தடங்கள் மெதுவானதாகவும் தடைகளின்றியும் இருப்பதால், இங்கு கயாக்கிங் செய்வது சுற்றுச்சூழலுக்கு இடையூறு விளைவிப்பதாக இல்லாமல், அதை மதித்து நடப்பது போன்ற உணர்வைத் தருகிறது. இது சூழல் சுற்றுலாவுக்கும், கேரளாவின் கடற்கரைச் சூழலியலை அருகில் இருந்து அனுபவிக்க விரும்பும் பார்வையாளர்களுக்கு ஒரு சிறந்த விருப்பத்தேர்வாக அமைகிறது.

இந்தச் செயல்பாடு ஆரம்பநிலையாளர்களுக்கு மிக நன்றாகப் பொருந்துகிறது. இந்தக் காயல்களில் பயன்படுத்துகின்ற கயாக்குகளும் சிறுபடகுகளும் (கனோகளும்) நிலையானதாக உள்ளன, பாதுகாப்பான சூழல் சமநிலையின்மைக்கான ஆபத்தைக் குறைக்கிறது. முதல் முறையாகப் படகு செலுத்துபவர்கள் கூட, தொடங்கிய சில நிமிடங்களிலேயே சௌகரியமாக உணரத் தொடங்குகின்றனர். சிறுபடகுகள் (கனோகள்) பெரும்பாலும் அனுபவத்தைப் பகிர்ந்துகொள்ள விரும்பும் குடும்பங்களால் அல்லது சிறு குழுக்களால் விரும்பப்படுகின்றன, அதே நேரத்தில் ஒருவர் அல்லது இருவர் செல்லும் கயாக்குகள் தனியாகப் பயணம் செய்பவர்கள் மற்றும் தம்பதியர் இடையே பிரபலமாக உள்ளன. தொழில்நுட்பம் அல்லது உடலுறுதியை விட சீரான இயக்கத்தின் மீதும், விழிப்புணர்வின் மீதும் கவனம் செலுத்தப்படுகிறது.