மணக்கடவு, மன்றோ தீவு

கொல்லம் மாவட்டத்தில் மன்றோ தீவில் அமைந்துள்ள மணக்கடவு, கேரளாவில் கயாக்கிங் செய்வதற்கு மிகவும் சாந்தமிக்க, அமைதியான இடங்களில் ஒன்றாகப் பரவலாகக் கருதப்படுகிறது. பிற பரபரப்பான காயல் பகுதிகளைப் போல் அல்லாமல், இந்த இடம் அமைதியான, குழப்பமில்லாத அனுபவத்தை வழங்குவதால் ஓய்வெடுக்க விரும்புவோருக்கு, இயற்கையோடு ஒன்றிணைய விரும்புவோருக்கு அல்லது நிதானமான வேகத்தில் சாகசம் மேற்கொள்ள விரும்புவோருக்கு இது மிகவும் உகந்த இடமாக விளங்குகிறது. செழிப்பான, பசுமையான தென்னந்தோப்புகளுக்கு இடையே மெல்ல வளைந்து செல்லும் ஏராளமான சிறிய நீரோடைகளும், குறுகிய கால்வாய்களும் இப்பகுதியின் சிறப்பம்சங்கள் ஆகும். இங்கு கயாக்கிங் செய்யும்போது சரிவான ஓடு வேய்ந்த கூரைகளைக் கொண்ட, மரத்தாலான பாரம்பரியக் கேரள வீடுகளைக் கடந்து துடுப்புப் படகில் அமைதியாகச் சறுக்கிச் செல்லும்போது, எளிமையான கிராமிய வாழ்க்கை முறைக்குத் திரும்பிச் சென்றது போன்ற உணர்வு நமக்கு ஏற்படுகின்றது.

மணக்கடவில் உள்ள நீர்வழித் தடங்கள் பொதுவாக அசைவற்றதாக உள்ளன, சில பகுதிகளில் நீரின் ஆழம் குறைவாக இருப்பதால் மென்மையான, எளிதான துடுப்புப் போடும் அனுபவத்தைப் பெற முடிகின்றது. மோட்டார் படகுகளோ அல்லது அதிக இரைச்சலை உண்டாக்கும் போக்குவரத்து வாகனங்களோ இல்லாததால், பனை ஓலைகளின் சலசலப்பு, தொலைவில் கேட்கும் பறவைகளின் ஒலி, கயாக்கின் அடியில் நீரின் மெல்லிய அசைவு என அலையாத்திப் பகுதியின் இயற்கையான ஒலிகளைப் பார்வையாளர்கள் ரசிக்க முடிகிறது. அமைதியான நீர்நிலை, பசுமை, பாரம்பரிய கிராமிய அழகு ஆகியவற்றின் இந்தச் சேர்க்கை மணக்கடவை புகைப்படக் கலைஞர்களையும், இயற்கை ஆர்வலர்களையும் மிகவும் கவர்ந்திழுக்கும் இடமாக ஆக்குகின்றது.