സി.ബി.എല്‍. മത്സരങ്ങള്‍ 2025

കൈനകരി വള്ളംകളി

ആലപ്പുഴയിലെ കുട്ടനാട്ടില്‍, മനോഹരമായ പ്രകൃതി ദൃശ്യങ്ങള്‍ കൊണ്ട്‌ സമ്പന്നമാണ്‌ കൈനകരി. പച്ചപ്പു നിറഞ്ഞ നെല്‍പ്പാടങ്ങളും തടാകവും നദികളും തോടുകളും കുളങ്ങളും സന്ദര്‍ശകരെ ഇവിടേയ്‌ക്കാകര്‍ഷിക്കുന്നു. പടിഞ്ഞാറന്‍ മലനിരകളില്‍ നിന്നുത്ഭവിക്കുന്ന പമ്പയടക്കമുള്ള 5 പ്രധാന നദികള്‍ കൈനകരിയിലെ വേമ്പനാട്ടു കായലിനെ പോഷിപ്പിക്കുന്നു. വെള്ളം കയറുന്ന സ്ഥലമായതിനാല്‍ അവിടെ ജീവിക്കുന്നവര്‍ യാത്രകള്‍ക്കും കച്ചവടത്തിനും മറ്റാവശ്യങ്ങള്‍ക്കുമായി വിവിധ വലുപ്പത്തിലുള്ള വള്ളങ്ങള്‍ ഉപയോഗിച്ചു വരുന്നു. കേരളത്തിന്റെ ഏറ്റവും ശ്രദ്ധേയരായ തുഴച്ചില്‍ക്കാരുടെ സംഘവും - യുണൈറ്റഡ്‌ ബോട്ട്‌ ക്ലബ്ബ്‌, കൈനകരി - ഇവിടെ നിന്നുമാണ്‌. 14 തവണ നെഹ്‌റു ട്രോഫി നേടിയ സംഘം എന്ന ബഹുമതി തകര്‍ക്കാന്‍ ഇതുവരെ മറ്റാര്‍ക്കും കഴിഞ്ഞിട്ടില്ല എന്നതും എടുത്തു പറയേണ്ട പ്രത്യേകതയാണ്‌. മറ്റൊരു പ്രത്യേകത ഈ മത്സരം കായലിലല്ല, പമ്പാ നദിയിലാണ്‌ എന്നുള്ളതാണ്‌. ഈ മത്സരവും സി.ബി.എല്ലില്‍ ഉള്‍പ്പെടുത്തിയിട്ടുണ്ട്‌.

കൂടുതൽ വായിക്കുക
ധര്‍മ്മടം വള്ളംകളി

ഉത്തര മലബാറിലെ ആകര്‍ഷകമായ വള്ളംകളി മത്സരങ്ങളിലൊന്നാണ് കണ്ണൂര്‍ ജില്ലയിലെ ധര്‍മ്മടത്തെ അഞ്ചരക്കണ്ടിപ്പുഴയില്‍ നടക്കുന്ന ചാമ്പ്യന്‍സ് ബോട്ട് ലീഗ്. സ്വദേശികളും, വിദേശികളുമായ കൂടുതല്‍ സന്ദര്‍ശകരെ ഉത്തര മലബാറില്‍ എത്തിക്കാന്‍ ഇങ്ങനെയുള്ള വള്ളംകളി മത്സരങ്ങള്‍ വഴി സാധിക്കുന്നു.

കൂടുതൽ വായിക്കുക
താഴത്തങ്ങാടി വള്ളംകളി

കേരള സാംസ്‌കാരിക പാരമ്പര്യത്തിന്റെ ഒരു പ്രധാന ഘടകമാണ്‌ വള്ളംകളി മത്സരം. ഇന്നത്തെ ചുണ്ടന്‍ വള്ളംകളി മത്സരങ്ങളുടെ തുടക്കം 1887-ല്‍ കോട്ടയത്തെ താഴത്തങ്ങാടിയില്‍ നിന്നാണ്‌. തിരുവിതാംകൂര്‍ ദിവാന്‍ പേഷ്‌ക്കാരായ രാമറാവുവിന്‌ അവകാശപ്പെട്ടതാണ്‌ താഴത്തങ്ങാടി വള്ളംകളി മത്സരത്തിന്റെ എല്ലാ ബഹുമതിയും.തിരുവിതാംകൂര്‍ ഭരണത്തിന്‌ മുമ്പ്‌ തെക്കുംകൂര്‍ രാജാക്കന്മാരായിരുന്നു കോട്ടയം ഭരിച്ചിരുന്നത്‌. അക്കാലത്ത്‌ രാജകുടുംബാംഗങ്ങളുടെ വിനോദത്തിനായി താഴത്തങ്ങാടിയില്‍ വള്ളംകളി മത്സരം നടത്തിയിരുന്നു. തെക്കുംകൂര്‍ ഭരണകാലത്ത്‌ രാജ്യ തലസ്ഥാനവും വ്യവസായിക കേന്ദ്രവുമായിരുന്നു താഴത്തങ്ങാടി. പിന്നീട്‌ ദിവാന്‍ രാമറാവുവിന്റെ കാലത്താണ്‌ കോട്ടയം നഗരം രൂപം കൊണ്ടതും അവിടേക്ക്‌ തലസ്ഥാനം മാറ്റിയതും. ചുണ്ടന്‍ വള്ളങ്ങളിലും കളിവള്ളങ്ങളിലുമുള്ള ദിവാന്റെ താല്‌പര്യമാണ്‌ താഴത്തങ്ങാടി വള്ളംകളി മത്സരത്തിന്‌ കാരണമായത്‌. വള്ളങ്ങളുടെ വ്യത്യസ്‌തത അനുസരിച്ച്‌ അദ്ദേഹം മത്സരങ്ങളേയും വിഭജിച്ചു. ഇതാണ്‌ ക്രമ പ്രകാരമുള്ള ആദ്യ വള്ളംകളി മത്സരത്തിന്റെ തുടക്കം.തദ്ദേശവാസികളുടെ അഭിമാനമായി മാറിയ ഈ മത്സരം പിന്നീട്‌ ഒരു വലിയ വാര്‍ഷികാഘോഷമായി മാറാന്‍ തന്നെ കാരണമായി.തിരുവിതാംകൂര്‍ രാജവംശത്തിന്റെ അവസാന രാജാവായിരുന്ന ശ്രീ ചിത്തിര തിരുനാള്‍ രാമവര്‍മ്മ 1937-ല്‍ ഈ മത്സരം കാണാനെത്തി എന്നത്‌ ഇതിന്റെ പ്രാധാന്യം എടുത്തു കാട്ടുന്നു. അദ്ദേഹത്തിന്റെ സന്ദര്‍ശനത്തെതുടര്‍ന്ന്‌ ശ്രീ ചിത്തിര ബോട്ട്‌ റേസ്‌ (ശ്രീ ചിത്തിര വള്ളംകളി) എന്ന പേരിലായിരുന്നു ഈ മത്സരം അറിയപ്പെട്ടത്‌. പിന്നീട്‌ 1956-ല്‍ എതോപ്യന്‍ ചക്രവര്‍ത്തിയായ 'ഹെയ്‌ലി സലാസി' കോട്ടയം സന്ദര്‍ശിക്കുകയും അദ്ദേഹത്തിന്റെ ബഹുമാനാര്‍ത്ഥം താഴത്തങ്ങാടിയില്‍ വള്ളംകളി സംഘടിപ്പിക്കുകയും ചെയ്‌തു. അതിനു ശേഷം ഈ മത്സരം 'ഹെയ്‌ലി സലാസി എവര്‍ റോളിങ്‌ ട്രോഫി' എന്നറിയപ്പെടാന്‍ തുടങ്ങി. പിന്നീടു വന്ന വര്‍ഷങ്ങളില്‍ ഈ വള്ളംകളി മത്സരം നടത്താന്‍ സാധിച്ചില്ല എങ്കിലും കോട്ടയത്തെ വെസ്‌റ്റ്‌ ക്ലബ്ബ്‌ മുന്‍കൈ എടുത്ത്‌ 1998 മുതല്‍ മത്സരം വീണ്ടും ആരംഭിച്ചു. അന്നു മുതല്‍ കോട്ടയം നഗരസഭ സംഘടിപ്പിക്കുന്ന താഴത്തങ്ങാടി വള്ളംകളിയില്‍ പ്രധാന ക്ലബ്ബുകളും ചുണ്ടന്‍ വള്ളങ്ങളും ഗോള്‍ഡന്‍ ജൂബിലി എവര്‍ റോളിങ്‌ ട്രോഫിക്കായി മത്സരിച്ചു വരുന്നു.

കൂടുതൽ വായിക്കുക
ചെറുവത്തൂര്‍ വള്ളംകളി

ഉത്തര മലബാറിലെ പ്രധാന വള്ളംകളി മത്സരങ്ങളില്‍ ഒന്നാണ് കാസര്‍കോഡ് ജില്ലയിലെ ചെറുവത്തൂരില്‍ നടക്കുന്ന ചാമ്പ്യന്‍സ് ബോട്ട് ലീഗ്. കോട്ടപ്പുറത്തെ തേജസ്വിനി പുഴയിലാണ് ഈ മത്സരങ്ങള്‍ നടത്തപ്പെടുന്നത്. ചുണ്ടന്‍ വള്ളങ്ങള്‍, ചുരുളന്‍, ഇരുട്ടുകുത്തി തുടങ്ങിയ വള്ളങ്ങളുടെ മത്സരങ്ങള്‍ ഈ പരിപാടിയുടെ മുഖ്യ ആകര്‍ഷണമാണ്. ചാമ്പ്യന്‍സ് ബോട്ട് ലീഗുമായി ബന്ധപ്പെട്ട് മനോഹരമായ ജലഘോഷയാത്രയും നടക്കുന്നതാണ്.

കൂടുതൽ വായിക്കുക
പിറവം വളളംകളി

കേരളത്തിലെ പഴക്കമേറിയ വള്ളംകളി മത്സരങ്ങളില്‍ ഒന്നാണ്‌ പിറവം വള്ളംകളി. നെഹ്‌റു ട്രോഫി വള്ളംകളിയില്‍ ആകൃഷ്ടരായ പിറവത്തെ ജനങ്ങള്‍ 1958-ല്‍ രൂപം നല്‍കിയതാണ്‌ ഈ മത്സരം. മൂവാറ്റു പുഴ നദിയില്‍ നടക്കുന്ന ഈ ചുണ്ടന്‍ വള്ളം കളിയില്‍, നദിയിലെ അടിയൊഴുക്കിനെതിരെ ശക്തമായി തുഴയേണ്ടതിനാല്‍ വളരെ ബുദ്ധിമുട്ടേറിയ മത്സരമായാണ്‌ കണക്കാക്കുന്നത്‌. ആദ്യകാലത്ത്‌ ചെറുവള്ളങ്ങളായ ഓടി, ഇരുട്ടു കുത്തി, കടത്തു വള്ളങ്ങള്‍ എന്നിവയായിരുന്നു മത്സര രംഗത്ത്‌ ഉണ്ടായിരുന്നത്‌. 1962-ല്‍ ചെറു വള്ളമായ വെപ്പു വള്ളങ്ങളും മത്സരത്തില്‍ ഉള്‍പ്പെടുത്തി. ചുണ്ടന്‍ വള്ളങ്ങളില്‍ പാര്‍ത്ഥ സാരഥി ചുണ്ടന്‍ വള്ളമായിരുന്നു ആദ്യമായി പങ്കെടുത്തത്‌. പിന്നീട്‌ എല്ലാ പ്രധാന ചുണ്ടന്‍ വള്ളങ്ങളും ഇവിടുത്തെ അടിയൊഴുക്കിനോടു മത്സരിക്കാന്‍ മൂവാറ്റുപുഴയില്‍ എത്തിച്ചേര്‍ന്നു. പിറവം നഗരസഭയെ 9 കരകളായി വിഭജിക്കുകയും ഓരോ കരയുടേയും പേരില്‍ മത്സരം നടത്തുകയും ചെയ്യുന്നു. കലമ്പൂര്‍ ആറ്റുതീരം പാര്‍ക്ക്‌ മുതല്‍ പിറവം പാലത്തിനു സമീപം വരെയാണ്‌ മത്സരം നടക്കുക. ഈ മത്സരത്തില്‍ പങ്കെടുക്കുവാന്‍ എല്ലാ ബോട്ട്‌ ക്ലബ്ബുകളും എത്തിച്ചേരുന്നു. പിറവം വള്ളംകളിയും സി.ബി.എല്ലില്‍ അംഗമാണ്‌.

കൂടുതൽ വായിക്കുക
മറൈന്‍ ഡ്രൈവ് വള്ളംകളി

മറൈന്‍ ഡ്രൈവ്‌ അഥവാ ഇന്ദിരാ ഗാന്ധി വള്ളംകളി എന്നത്‌ കേരളം മറന്നു തുടങ്ങിയ മത്സരമായിരുന്നു. അന്തരിച്ച മുന്‍ പ്രധാന മന്ത്രി ഇന്ദിരാ ഗാന്ധിയുടെ പേരിലുള്ള ഈ മത്സരം ആരംഭിച്ചത്‌ 1989-ലാണ്‌. ആദ്യ മൂന്നു വര്‍ഷങ്ങളില്‍ മത്സരം യഥാക്രമം തുടര്‍ന്നു എങ്കിലും സാമ്പത്തിക-സംഘടനാ വിഷമതകള്‍ മൂലം ഇതു വിസ്‌മൃതിയിലായി. എന്നാല്‍ 2019 മുതല്‍ ഈ മത്സരത്തെ CBL-ല്‍ ഉള്‍പ്പെടുത്തിക്കൊണ്ട്‌ കേരള വിനോദ സഞ്ചാര വകുപ്പ്‌ ഇതിനെ പുനര്‍ ജീവിപ്പിച്ചു. ദിവസം മുഴുവന്‍ നീണ്ടു നില്‍ക്കുന്ന സാംസ്‌കാരിക - കലാപരിപാടികളിലൂടെ വിദേശികളേയും സ്വദേശികളേയും ഒരുപോലെ ആകര്‍ഷിക്കാന്‍ ഈ മത്സരത്തിനു കഴിയുന്നു. ഗോശ്രീ പാലം മുതല്‍ മറൈന്‍ ഡ്രൈവ്‌ ജെട്ടി വരെയാണ്‌ മത്സരപാത. ആഴവും അടിയൊഴുക്കും ഇല്ലാത്ത ഈ പാത, കേരളത്തിലെ ഏറ്റവും ബുദ്ധിമുട്ടേറിയ ചുണ്ടന്‍ വള്ളംകളി മത്സരവേദിയാണ്‌. അതുകൊണ്ടു തന്നെ തുഴക്കാരുടെ ശക്തിയും ഊര്‍ജ്ജവും ശൈലിയുമനുസരിച്ചാണ്‌ വിജയം കൈവരിയ്‌ക്കാനാവുക.

കൂടുതൽ വായിക്കുക
ബേപ്പൂര്‍ വള്ളംകളി

കേരളത്തിലെ പാരമ്പര്യ വള്ളംകളി ശൃംഖലയിലേക്ക്‌ പുതിയതായി ചേര്‍ക്കപ്പെട്ടതാണ്‌ ബേപ്പൂര്‍ വള്ളംകളി. കേരളത്തിലെ വടക്കന്‍ ജില്ലകളെ കൂടി വള്ളംകളിയില്‍ ഉള്‍പ്പെടുത്തുക എന്ന ലക്ഷ്യമാണ്‌ കേരളാ വിനോദ സഞ്ചാര വകുപ്പ്‌ ഇതിലൂടെ പ്രാവര്‍ത്തികമാക്കുന്നത്‌. കോഴിക്കോടു ജില്ലയിലെ ചരിത്ര കഥകള്‍ പറയുന്ന തുറമുഖ പട്ടണമായ ബേപ്പൂരിലെ ചാലിയാര്‍ നദിയില്‍, ഫറോക്കിലെ പുതിയതും പഴയതുമായ പാലങ്ങള്‍ക്കിടയിലാണ്‌, ഈ മത്സരം നടത്തുന്നത്‌. ഇത്‌ സി.ബി.എല്ലില്‍ ഉള്‍പ്പെടുത്തിയിട്ടുണ്ടെങ്കിലും മത്സരത്തില്‍ ചുണ്ടന്‍ വള്ളങ്ങളല്ല പകരം വടക്കന്‍ കേരളത്തിലെ ചുരുളന്‍ വള്ളങ്ങളാണ്‌ പരസ്‌പരം മാറ്റുരയ്‌ക്കുന്നത്‌. അടുത്തിടയാണ്‌ വള്ളംകളി ആരംഭിച്ചതെങ്കിലും ജനങ്ങളെ ഏറെ ആകര്‍ഷിക്കുന്ന ഒരു മത്സരമായി ഇതു മാറിക്കഴിഞ്ഞു. കേരളാ വിനോദ സഞ്ചാരത്തിലെ സാഹസിക ജലോത്സവമായ ബേപ്പൂര്‍ ജലോത്സവത്തിന്റെ ഭാഗമായാണ്‌ ഈ വള്ളംകളി നടത്തുന്നത്‌. അന്തര്‍ദ്ദേശീയ രംഗത്തും സാഹസിക - കായികാഭ്യാസങ്ങള്‍ നടത്താനുള്ള വേദിയായി ബേപ്പൂരിനെ അടയാളപ്പെടുത്തിക്കഴിഞ്ഞതോടെ ഇന്ത്യയിലെ തന്നെ ജലോത്സവത്തിന്റെ പ്രധാന ഇടമായി ബേപ്പൂര്‍ മാറി. വള്ളംകളി കൂടാതെ ചെറു നൗകകള്‍, കയാക്കിംഗ്‌, പാരാസെയ്‌ലിങ്‌, വേഗതയേറിയ ബോട്ടുകളുടെ മത്സരം, ചങ്ങാട മത്സരം, മരത്തടിയിലുള്ള തുഴച്ചില്‍ മത്സരം തുടങ്ങിയവയെല്ലാം ഇവിടെ സംഘടിപ്പിക്കുന്നു. ബേപ്പൂരിലെ മറീന ബീച്ചും, ചാലിയം തീരദേശവും ഇത്തരം അഭ്യാസങ്ങള്‍ക്ക്‌ ഏറെ അനുയോജ്യമാണ്‌. ഇതോടൊപ്പം സംഗീത സായാഹ്നങ്ങള്‍, വൈവിദ്ധ്യമാര്‍ന്ന രുചി വിശേഷങ്ങള്‍, അന്തര്‍ദ്ദേശീയ തലത്തിലുള്ള ചര്‍ച്ചകള്‍, പട്ടം പറത്തല്‍, നാവികസേനയുടെയും, തീരസംരക്ഷണസേനയുടെയും ആകാശ വിസ്‌മയ പ്രദര്‍ശനങ്ങള്‍ എന്നിവയാലും ഈ ആഘോഷം സമ്പന്നമാണ്‌.

കൂടുതൽ വായിക്കുക
കോട്ടപ്പുറം വള്ളംകളി

തൃശ്ശൂരിലെ പ്രശസ്‌തമായ രണ്ടു വള്ളംകളി മത്സരങ്ങളില്‍ ഒന്നാണ്‌ കോട്ടപ്പുറം വള്ളംകളി. കൊടുങ്ങല്ലൂര്‍ - കോട്ടപ്പുറം കായലിലെ ഈ മത്സരം തുടങ്ങിയിട്ട്‌ 26 വര്‍ഷം കഴിഞ്ഞു എങ്കിലും സാമ്പത്തിക പരാധീനതകള്‍ മൂലവും സംഘടനാ പ്രശ്‌നങ്ങള്‍ മൂലവും ഏറെ വര്‍ഷങ്ങള്‍ ഈ മത്സരം നടത്താന്‍ സാധിച്ചില്ല. എന്നാല്‍ കോട്ടപ്പുറം വള്ളംകളിക്ക്‌ പുത്തനുണര്‍വ്വുണ്ടാക്കുവാന്‍ കേരള വിനോദ സഞ്ചാര വകുപ്പിന്റെ ഇടപെടലുകള്‍ക്കു കഴിഞ്ഞു. ഇന്ന്‌ ചാമ്പ്യന്‍സ്‌ ബോട്ട്‌ ലീഗിന്റെ ഭാഗമായ കോട്ടപ്പുറം വള്ളംകളി ഒരു വന്‍ ജലോത്സവമായി ആഘോഷിക്കുന്നു.

കൂടുതൽ വായിക്കുക
പുളിങ്കുന്ന് വള്ളംകളി

ആലപ്പുഴ ജില്ലയിലെ മറ്റൊരു പ്രധാന മത്സരമാണ്‌ പുളിങ്കുന്ന്‌ വള്ളംകളി. അന്തരിച്ച മുന്‍ പ്രധാനമന്ത്രി രാജീവ്‌ ഗാന്ധിയുടെ സ്‌മരണാര്‍ത്ഥമുള്ള ഈ വള്ളംകളി നടക്കുന്നത്‌ പമ്പാ നദിയിലാണ്‌. രാജീവ്‌ ഗാന്ധി 1985-ല്‍ കുട്ടനാടു സന്ദര്‍ശിച്ചപ്പോള്‍, ചുണ്ടന്‍ വള്ളങ്ങളുടെ പ്രദര്‍ശനം സംഘടിപ്പിച്ചാണ്‌ അദ്ദേഹത്തെ സ്വാഗതം ചെയ്‌തത്‌. 1991-ല്‍ രാജീവ്‌ ഗാന്ധി കൊല്ലപ്പെട്ടതോടെ അദ്ദേഹത്തിന്റെ സ്‌മരണാര്‍ത്ഥം എല്ലാ വര്‍ഷവും ആഗസ്‌റ്റ്‌ മാസത്തിലെ അവസാന ശനിയാഴ്‌ച ഒരു ചുണ്ടന്‍ വള്ളംകളി നടത്താന്‍ പുളിങ്കുന്നു നിവാസികള്‍ തീരുമാനിക്കുകയും മത്സര വിജയിക്കു നല്‍കുന്ന രാജീവ്‌ ഗാന്ധി ട്രോഫി, കേരള മുന്‍ മുഖ്യമന്ത്രി കെ. കരുണാകരന്‍ വാഗ്‌ദാനം ചെയ്യുകയും ചെയ്‌തു. ഇന്ന്‌ കേരളത്തിലെ എല്ലാ പ്രധാന ബോട്ട്‌ ക്ലബ്ബുകളും പങ്കെടുക്കുന്ന ഈ മത്സരം കേരള വിനോദ സഞ്ചാരത്തിന്റെ CBL-ല്‍ ഉള്‍പ്പെടുത്തിയിട്ടുണ്ട്‌.

കൂടുതൽ വായിക്കുക
കരുവാറ്റ വള്ളം കളി

ആലപ്പുഴ ജില്ലയിലെ കരുവാറ്റ ഗ്രാമത്തിലാണ്‌ എല്ലാ വര്‍ഷവും ഓണക്കാലത്ത്‌ കരുവാറ്റ വള്ളംകളി നടക്കുന്നത്‌. ബ്രദേഴ്‌സ്‌ ട്രോഫി വള്ളംകളി എന്നും ഇതറിയപ്പെടുന്നു. ഈ വള്ളംകളിയോടനുബന്ധിച്ച്‌ പല കലാ-സാംസ്‌കാരിക മേളകളും സംഘടിപ്പിക്കാറുണ്ട്‌. 1966-ല്‍ കരുവാറ്റ ബ്രദേഴ്‌സ്‌ ആന്റ്‌ സ്‌പോര്‍ട്‌സ്‌ ക്ലബ്ബാണ്‌ ഈ മത്സരം ആരംഭിച്ചത്‌. ആദ്യകാലത്ത്‌ 'കരുവാറ്റ ലീഡിങ്‌ ചാനല്‍ ബോട്ട്‌ റേസ്‌' എന്നറിയപ്പെട്ടിരുന്ന വള്ളംകളി കാണാന്‍ ജലമാര്‍ഗ്ഗത്തിന്റെ ഇരുകരകളിലും ആളുകള്‍ തിങ്ങി നിറഞ്ഞിരുന്നു. തൈവൈപ്പിന്‍ കടവ്‌ മുതല്‍ സെന്റ്‌ ജോസഫ്‌ പള്ളി വരെ 1200 മീറ്റര്‍ നീളത്തിലാണ്‌ ഈ മത്സരപ്പാത. മത്സരം കാണാനായി പള്ളി പരിസരത്ത്‌ സ്ഥിര പവിലിയനും ഒരുക്കിയിട്ടുണ്ട്‌. ബ്രദേഴ്‌സ്‌ ട്രോഫി വള്ളംകളിയില്‍ ചെറിയ ചുണ്ടന്‍ വള്ളങ്ങളായ ചുരുളന്‍, ഓടി, വെപ്പ്‌ എന്നിവയായിരുന്നു പങ്കെടുത്തിരുന്നത്‌. എന്നാല്‍ ഇന്ന്‌ എല്ലാ പ്രധാന ചുണ്ടന്‍ വള്ളങ്ങളും ട്രോഫിക്കായി മത്സരിക്കുന്നുണ്ട്‌. വര്‍ണ്ണാഭമായ ഘോഷയാത്രയടക്കം പല ആഘോഷങ്ങളും ഈ മത്സരത്തില്‍ ഉള്‍പ്പെടുത്തിയിട്ടുണ്ട്‌. ഇന്ന്‌ കേരള വിനോദ സഞ്ചാരവകുപ്പിന്റെ സി.ബി.എല്ലില്‍ കരുവാറ്റ വള്ളംകളിയും ഉള്‍പ്പെടുന്നു.

കൂടുതൽ വായിക്കുക
പാണ്ടനാട്‌ വള്ളംകളി

ആലപ്പുഴ ജില്ലയില്‍ ചെങ്ങന്നൂര്‍ താലൂക്കിലാണ്‌ പാണ്ടനാട്‌. ഇതേ പേരിലാണ്‌ ഈ വള്ളംകളി മത്സരവും നടക്കുന്നത്‌. ചെങ്ങന്നൂര്‍ സ്ഥലവാസികള്‍ ചേര്‍ന്നാരംഭിച്ച ഈ ജലോത്സവം അടുത്തിടെയാണ്‌ കേരള ടൂറിസം ചാമ്പ്യന്‍സ്‌ ബോട്ട്‌ ലീഗില്‍ (CBL) ഉള്‍പ്പെടുത്തിയത്‌. ചുണ്ടന്‍ വള്ളങ്ങളും പള്ളിയോടങ്ങളും പങ്കെടുക്കുന്ന ഈ മത്സരം ആരംഭിക്കുന്നത്‌ പാണ്ടനാട്‌ മിത്രം മഠത്തില്‍ നിന്നുമാണ്‌. പമ്പ നദിയുടെ ഭാഗമായ നെട്ടയം നദിയിലാണ്‌ ഈ മത്സരവും നടക്കുന്നത്‌. ആറന്മുള പള്ളിയോടത്തിന്റെ ശൈലിയിലാണ്‌ പാണ്ടനാട്‌ ജലോത്സവം നടക്കുക. അഞ്ചുകരയിലെ (പാണ്ടനാട്‌, കീഴ്‌വന്മഴി, വന്മഴി, മുതവഴി, പ്രയാര്‍) അഞ്ചു പള്ളിയോടങ്ങള്‍ ഈ മത്സരത്തില്‍ മാറ്റുരയ്‌ക്കും. പള്ളിയോടങ്ങളുടെ ഘോഷയാത്രയോടെ തുടങ്ങുന്ന ആഘോഷത്തില്‍ സാംസ്‌കാരിക കലാപരിപാടികളും ചര്‍ച്ചകളും ഉണ്ടായിരിക്കും.

കൂടുതൽ വായിക്കുക
കായംകുളം വള്ളംകളി

ആലപ്പുഴ ജില്ലയിലെ കായംകുളം കായലിലാണ്‌ ഈ വള്ളംകളി നടത്തുന്നത്‌. 2010-ല്‍ ആരംഭിച്ച ഈ മത്സരം, കേരളത്തില്‍ പുതിയതായി തുടങ്ങിയ മത്സരങ്ങളില്‍ ഒന്നാണ്‌. ഈ വള്ളംകളി പുതിയതാണെങ്കിലും ചുണ്ടന്‍ വള്ളങ്ങളുടെ ചരിത്രത്തില്‍ കായംകുളത്തിനുള്ള പ്രാധാന്യം വലുതാണ്‌. ചെമ്പകശ്ശേരി രാജവംശവും കായംകുളം രാജവംശവും തമ്മിലുള്ള കുടിപ്പകയാണ്‌ കേരളത്തിന്റെ ചുണ്ടന്‍ വള്ളങ്ങളുടെ ഉത്ഭവത്തിനു കാരണം. കായലിലെ പോരാട്ടത്തിനായി ഇവര്‍ രൂപകല്‌പന ചെയ്‌തതാണ്‌ ചുണ്ടന്‍ വള്ളങ്ങള്‍ എന്നു പറയപ്പെടുന്നു. കേരളത്തിലെ കായലുകളുടെ വലിപ്പത്തില്‍ മൂന്നാം സ്ഥാനമാണ്‌ കായംകുളം കായലിനുള്ളത്‌. കാര്‍ത്തികപ്പള്ളിയിലെ പള്ളി മുതല്‍ പന്മന വരെ നീണ്ടു കിടക്കുന്ന മത്സരപ്പാതയ്‌ക്ക്‌ 1200 മീറ്റര്‍ നീളവും 70 മീറ്റര്‍ വീതിയുമുണ്ട്‌. മത്സരമാരംഭിക്കുന്ന സ്ഥലത്തും അവസാനിക്കുന്ന സ്ഥലത്തും വെള്ളത്തില്‍ തന്നെ പ്രത്യേക കൂടാരങ്ങള്‍ നിര്‍മ്മിക്കുന്നു എന്നതും ഈ മത്സരത്തിന്റെ പ്രത്യേകതയാണ്‌.

കൂടുതൽ വായിക്കുക
കല്ലട വള്ളംകളി

കൊല്ലം ജില്ലയിലെ മണ്‍റോ തുരുത്തില്‍ എല്ലാ വര്‍ഷവും നടന്നു വരുന്ന ജലോത്സവമാണ്‌ കല്ലട വള്ളംകളി. ഓണം മുതല്‍ 28-ാം ദിവസം - മലയാള മാസം കന്നിയില്‍ - ആണ്‌ കല്ലട വള്ളംകളി നടക്കുക. അതിനാല്‍ ഓണാഘോഷത്തിലെ അവസാന വള്ളംകളി മത്സരമായാണ്‌ ഇതിനെ കണക്കാക്കുന്നത്‌. തെക്കന്‍ കേരളത്തില്‍ നടക്കുന്ന ഒരു പ്രധാന മത്സരമായതിനാല്‍ പ്രശസ്‌ത ചുണ്ടന്‍ വള്ളങ്ങളും ബോട്ട്‌ ക്ലബ്ബുകളും ഇതില്‍ പങ്കെടുക്കുന്നു. കല്ലട നദിയിലെ പുത്തിരപറമ്പില്‍ - 1400 മീറ്റര്‍ നീളത്തിലാണ്‌ മത്സരപ്പാത. ഏറെ ജനങ്ങളെ ആകര്‍ഷിച്ചു വരുന്ന കല്ലട വള്ളംകളിയും സി.ബി.എല്ലില്‍ ഉള്‍പ്പെടുത്തിയിട്ടുണ്ട്‌.

കൂടുതൽ വായിക്കുക
പ്രസിഡന്‍സ് ട്രോഫി വള്ളംകളി

കേരളപ്പിറവി ദിനമായ നവംബര്‍ 1-നാണ്‌ കൊല്ലം ജില്ലയിലെ അഷ്ടമുടിക്കായലില്‍ എല്ലാ വര്‍ഷവും പ്രസിഡന്റ്‌സ്‌ ട്രോഫി വള്ളംകളി മത്സരം നടത്തുന്നത്‌. 2011 ആഗസ്റ്റ്‌ 31-നായിരുന്നു ഇവിടുത്തെ ആദ്യ മത്സരം നടന്നത്‌. അന്നത്തെ രാഷ്ട്രപതിയായിരുന്ന പ്രതിഭാ പാട്ടീല്‍ ഈ മത്സരം കാണാനെത്തിയതിന്റെ ബഹുമാനാര്‍ത്ഥമാണ്‌ മത്സരത്തിന്‌ ഈ പേരു ലഭിച്ചത്‌. ഇന്ന്‌ കേരള ടൂറിസത്തിന്റെ ഭാഗമായ ചാമ്പ്യന്‍സ്‌ ബോട്ട്‌ ലീഗില്‍ ഈ മത്സരവും ഉള്‍പ്പെട്ടിരിക്കുന്നു.തേവള്ളി പാലത്തില്‍ നിന്നും കെ.എസ്‌.ആര്‍.ടി.സി.ക്കു സമീപമുള്ള ബോട്ടു ജെട്ടി വരെ നീണ്ടു കിടക്കുന്ന 1200 മീറ്റര്‍ മത്സര പാതയാണ്‌ ഇവിടെയുള്ളത്‌. നെഹ്‌റു ട്രോഫി കഴിഞ്ഞാല്‍ ഏറ്റവുമധികം സമ്മാനത്തുക നല്‍കുന്നത്‌ പ്രസിഡന്റ്‌സ്‌ ട്രോഫി വള്ളംകളിക്കാണ്‌. ലീഗിലെ പ്രകടനമനുസരിച്ചാണ്‌ ഇപ്പോള്‍ വിജയികളെ തീരുമാനിക്കുക. 16 ചുണ്ടന്‍ വള്ളങ്ങള്‍ പങ്കെടുത്ത ഉദ്‌ഘാടന മഹാമഹം ഒരു വന്‍ വിജയമായിരുന്നു. കൊല്ലത്തെ ഫ്രാന്‍സിസ്‌ ബോട്ട്‌ ക്ലബ്ബ്‌ ആദ്യ പ്രകടനത്തില്‍ തന്നെ ട്രോഫി കരസ്ഥമാക്കി. മറ്റു വിഭാഗത്തില്‍പ്പെട്ട വെപ്പ്‌, ഇരുട്ടു കുത്തി, തെക്കന്‍വടി തുടങ്ങിയ വള്ളങ്ങളുടെയും മത്സരങ്ങള്‍ നടന്നു.

കൂടുതൽ വായിക്കുക

മറ്റു മത്സരങ്ങള്‍

നെഹ്‌റു ട്രോഫി വള്ളംകളി

നെഹ്‌റു ട്രോഫി അഥവാ പ്രൈം മിനിസ്റ്റേഴ്‌സ് ട്രോഫി എന്നത് ചുണ്ടന്‍ വള്ളംകളി മത്സരത്തിലെ ഓസ്‌കാര്‍ അവാര്‍ഡാണ്. എല്ലാ വര്‍ഷവും നല്‍കി വരുന്ന ഈ ട്രോഫി നേടുക എന്നതാണ് വള്ളംകളി സംഘങ്ങളുടെയും ചുണ്ടന്‍ വള്ള ഉടമകളുടെയും സ്വപ്നം. ഈ വള്ളംകളിയുടെ ഉത്ഭവം 1952-ല്‍ അന്നത്തെ പ്രധാനമന്ത്രി ജവഹര്‍ലാല്‍ നെഹ്‌റുവിന്റെ കേരള സന്ദര്‍ശനവുമായി ബന്ധപ്പെട്ടു കിടക്കുന്നു. 1952 ഡിസംബര്‍ 22-ന് പ്രധാന മന്ത്രിയുടെ ബഹുമാനാര്‍ത്ഥം ആലപ്പുഴയില്‍ ഒരു വള്ളംകളി നടത്തുകയുണ്ടായി. അതിമനോഹരമായ വള്ളംകളിയുടെ സൗന്ദര്യത്തില്‍ ആകൃഷ്ടനായ നെഹ്‌റു, പ്രധാനമന്ത്രിക്കുള്ള ഔദ്യോഗിക നിയന്ത്രണങ്ങള്‍ ലംഘിച്ച്, മത്സരത്തില്‍ വിജയിയായ നടുഭാഗം ചുണ്ടന്‍ വള്ളത്തില്‍ ആലപ്പുഴ നഗരത്തിലേക്ക് യാത്ര നടത്തി. ഡല്‍ഹിയില്‍ തിരിച്ചെത്തിയ നെഹ്‌റു, സ്വന്തം കൈപ്പട രേഖപ്പെടുത്തിയ വെള്ളിയില്‍ തീര്‍ത്ത ഒരു ട്രോഫി അയച്ചു കൊടുക്കുകയുണ്ടായി. ആ സംഭവത്തിനു ശേഷം എല്ലാ വര്‍ഷവും വള്ളംകളി മത്സരം നടത്താന്‍ തീരുമാനിക്കുകയും ചെയ്തു. നെഹ്‌റു നല്‍കിയ ട്രോഫി പിന്നീട് പ്രൈംമിനിസ്റ്റേഴ്‌സ് ട്രോഫി എന്നറിയപ്പെടാന്‍ തുടങ്ങി എങ്കിലും ഇന്നും ഈ മത്സരം പറയപ്പെടുന്നത് നെഹ്‌റു ട്രോഫി വള്ളംകളി എന്നു തന്നെയാണ്. ആദ്യത്തെ നെഹ്‌റു ട്രോഫി വള്ളംകളി മത്സരം നടന്നത് 1954-ല്‍ കൈനകരി മീനപ്പിള്ളി കായലിലാണ്. ഉദ്ഘാടനത്തിലെ വിജയി കാവാലം ചുണ്ടനായിരുന്നു. പിന്നീട് ചില പ്രതികൂല സാഹചര്യങ്ങളാല്‍ കൈനകരിയില്‍ നിന്നും മാറി പുന്നമടക്കായലിലെ 1380 മീറ്റര്‍ മത്സരപ്പാത സ്ഥിരം വേദിയായി. കേരളത്തിലെ ഒരു പ്രധാന സാംസ്‌കാരിക - കായിക ഇനമായ നെഹ്‌റു ട്രോഫി വള്ളംകളി പല വിദേശ സന്ദര്‍ശകരേയും ആകര്‍ഷിക്കുന്നു. അതുകൊണ്ടു തന്നെ ഏറെ അഭിമാനത്തോടെയാണ് കേരള വിനോദ സഞ്ചാരവകുപ്പിന്റെ ചാമ്പ്യന്‍സ് ബോട്ട് ലീഗില്‍ ഇതിനെ ഉള്‍പ്പെടുത്തിയത്. നെഹ്‌റു ട്രോഫി മത്സരത്തോടെയാണ് വള്ളംകളി മത്സരങ്ങളുടെ ആരംഭം.

കൂടുതൽ വായിക്കുക
ആറന്മുള വള്ളംകളി

കേരളത്തിലെ മറ്റേതൊരു വള്ളംകളി മത്സരത്തേക്കാളും ഏറെ ശ്രദ്ധ നേടിയതാണ്‌ പത്തനംതിട്ട ജില്ലയിലെ ആറന്മുള വള്ളംകളി. ഓണത്തോടനുബന്ധിച്ച്‌ ഉതൃട്ടാതി നാളില്‍ നടത്തുന്ന (ആഗസ്‌റ്റ്‌ - സെപ്‌റ്റംബര്‍) ഈ വള്ളംകളി ആറന്മുളയുടെ ചരിത്രവും സംസ്‌കാരവുമായി വളരെയേറെ ബന്ധപ്പെട്ടു കിടക്കുന്നു. ഐതിഹ്യവും പുരാണകഥകളും നിറഞ്ഞ ആറന്മുള വള്ളംകളിയുടെ ചരിത്ര പ്രാധാന്യത്തെ തിരിച്ചറിയുന്ന തദ്ദേശവാസികള്‍ക്കും സന്ദര്‍ശകര്‍ക്കും ഈ മത്സരം ത്രസിപ്പിക്കുന്ന ഒരനുഭവം തന്നെയാണ്‌. ആറന്മുള പാര്‍ത്ഥസാരഥി ക്ഷേത്രത്തിലെ ചടങ്ങുകളുമായി ചേര്‍ന്നു നില്‌ക്കുന്നതാണ്‌ ഈ വള്ളംകളി മത്സരവും. ഇതില്‍ പങ്കെടുക്കുന്ന എല്ലാ ചുണ്ടന്‍ വള്ളങ്ങള്‍ക്കും തുഴക്കാര്‍ക്കും ഭഗവാന്റെ അനുഗ്രഹം ലഭിക്കുമെന്നാണ്‌ വിശ്വാസം. വള്ളംകളിയുമായി ബന്ധപ്പെട്ട അതി പ്രശസ്‌തമായ മറ്റൊരു ചടങ്ങാണ്‌ ആറന്മുള വള്ള സദ്യ. ഇതിനു പിന്നിലും ഒരു കഥയുണ്ട്‌. തനിക്ക്‌ ആറന്മുള ക്ഷേത്രത്തില്‍ ഓണസദ്യ വേണമെന്ന്‌ ഭഗവാന്‍ ശ്രീകൃഷ്‌ണന്‍ ആവശ്യപ്പെടുന്നതായ സ്വപ്‌നം കാട്ടൂര്‍ മാങ്ങാട്ടില്ലത്തെ ധനികനായ ഭട്ടതിരി കാണുകയും ആ വര്‍ഷം മുതല്‍ ഓണസദ്യയ്‌ക്കുള്ള സാധനങ്ങളുമായുള്ള വള്ളം - തിരുവോണത്തോണി - അദ്ദേഹം ക്ഷേത്രത്തില്‍ എത്തിക്കുകയും ചെയ്യുന്നു. ഈ തിരുവോണത്തോണിയുടെ വരവും വലിയൊരു ആഘോഷമാണ്‌. ഈ തിരുവോണത്തോണിയെ ആതിഥേയരായ ചുണ്ടന്‍ വള്ളങ്ങള്‍ പിന്‍തുടരുന്നതും മറ്റൊരു പ്രത്യേകതയാണ്‌. പണ്ട്‌ തിരുവോണത്തോണിയുമായെത്തിയ ഭട്ടതിരിയെ വഴിയില്‍ വച്ച്‌ ആക്രമിച്ച കൊള്ളക്കാരില്‍ നിന്നും ചുണ്ടന്‍ വള്ളങ്ങളിലെത്തിയ നാട്ടുകാര്‍ രക്ഷിച്ചതിന്റെ ഓര്‍മ്മ പുതുക്കല്‍ കൂടിയാണിത്‌. ഇവിടുത്തെ വള്ളംകളി മത്സരത്തില്‍ പങ്കെടുക്കുക സാധാരണ കണ്ടു വരുന്ന ചുണ്ടന്‍ വള്ളങ്ങളല്ല. 'പള്ളിയോടം' എന്നറിയപ്പെടുന്ന പ്രത്യേക തരത്തിലുള്ള ചുണ്ടന്‍ വള്ളങ്ങളാണ്‌ ഇവ. ഈ പള്ളിയോടങ്ങള്‍ ആറന്മുള ക്ഷേത്രത്തിലെ ഭഗവാന്‍ പാര്‍ത്ഥസാരഥിയ്‌ക്ക്‌ സമര്‍പ്പിച്ചതായാണ്‌ കരുതുന്നത്‌. ആറന്മുള വള്ളംകളിയുടെ പ്രധാന പ്രത്യേകത മത്സരത്തിനിടെ പാടുന്ന വഞ്ചിപ്പാട്ടുകളാണ്‌. രാമപുരത്തു വാര്യര്‍ രചിച്ച കുചേലവൃത്തം വഞ്ചിപ്പാട്ടിനനുസരിച്ച്‌ തുഴക്കാര്‍ ആഞ്ഞു തുഴഞ്ഞു വരുന്ന കാഴ്‌ച ഏറെ ആകര്‍ഷണീയമാണെന്നതില്‍ സംശയമില്ല. പമ്പാനദിയില്‍ നടക്കുന്ന വള്ളംകളി മത്സരത്തില്‍ പങ്കെടുക്കുന്ന പള്ളിയോടങ്ങളെ A, B എന്നീ രണ്ടു വിഭാഗങ്ങളായി തിരിച്ചിട്ടുണ്ട്‌.

കൂടുതൽ വായിക്കുക
ചമ്പക്കുളം വള്ളംകളി

എല്ലാ വര്‍ഷവും കേരളത്തിലെ ചുണ്ടന്‍ വള്ളംകളി മത്സരം ആരംഭിക്കുന്നത്‌ ആലപ്പുഴ ജില്ലയിലെ ചമ്പക്കുളം വള്ളംകളിയിലൂടെയാണ്‌. ഇതു നടക്കുന്നത്‌ പമ്പാനദിയുടെ ശാഖയായ ചമ്പക്കുളം നദിയിലാണ്‌. ഈ വള്ളംകളിയുടെ ആരംഭം നോക്കിയാല്‍ ഏകദേശം നാലു നൂറ്റാണ്ടുകള്‍ക്കു പിന്നിലേക്കു പോകേണ്ടി വരും. ചെമ്പകശ്ശേരി രാജവംശകാലത്തു നടന്ന അമ്പലപ്പുഴ ശ്രീകൃഷ്‌ണസ്വാമി ക്ഷേത്രത്തിലെ പുനര്‍ പ്രതിഷ്‌ഠയുമായി ഇതു ബന്ധപ്പെട്ടു കിടക്കുന്നു. ക്ഷേത്രത്തിലെ വിഗ്രഹം ആരാധനയ്‌ക്കു സാധിക്കാത്ത വിധത്തില്‍ അശുദ്ധമായതിനെ തുടര്‍ന്ന്‌ പുതിയ വിഗ്രഹത്തിനായി അന്വേഷണം നടത്തുകയും കുറുച്ചി കരിക്കുളം (Karikkulam) പാര്‍ത്ഥ സാരഥി ക്ഷേത്രത്തിലെ വിഗ്രഹം പകരം കണ്ടെത്തുകയും ചെയ്‌തു. ആ വിഗ്രഹം അമ്പലപ്പുഴയിലേക്കു കൊണ്ടു വരാന്‍ തന്റെ മന്ത്രിയേയും സംഘത്തേയും നിയോഗിച്ചു. വരുന്ന വഴിയില്‍ കൊള്ളക്കാരുടെ ആക്രമണം തടയുവാനായി മാപ്പിളശ്ശേരി കുടുംബത്തില്‍ തങ്ങുവാനും രാജാവ്‌ നിര്‍ദ്ദേശിച്ചു. പിറ്റേദിവസം രാജാവ്‌ സ്വയം മാപ്പിളശ്ശേരിയില്‍ എത്തുകയും ശ്രീകൃഷ്‌ണ വിഗ്രഹം വലിയ ആഘോഷപൂര്‍വ്വം അമ്പലപ്പുഴയ്‌ക്ക്‌ കൊണ്ടു പോവുകയും ചെയ്‌തു. ഈ ഘോഷയാത്രയുടെ സ്‌മരണാര്‍ത്ഥമാണ്‌ ചമ്പക്കുളം വള്ളംകളി നടത്തുന്നത്‌. അതി പ്രശസ്‌തമായ അമ്പലപ്പുഴ പാല്‍പ്പായസവുമായി എല്ലാ വര്‍ഷവും ക്ഷേത്രത്തില്‍ നിന്നും ഒരു സംഘം മാപ്പിളശ്ശേരിയിലേക്ക്‌ എത്തുകയും മത്സരം തുടങ്ങുന്നതിന്‌ മുമ്പ്‌ പ്രത്യേക പ്രാര്‍ത്ഥനകളും ചടങ്ങുകളും നടത്തുകയും ചെയ്യുന്നത്‌ ഇന്നും തുടര്‍ന്നു വരുന്നു. 1927-ല്‍ ചമ്പക്കുളം വള്ളംകളി മത്സരം ഉദ്‌ഘാടനം ചെയ്‌തത്‌ തിരുവിതാംകൂര്‍ ദിവാനായിരുന്ന M. E. Watts ആയിരുന്നു. 1952-ല്‍ തിരുവിതാംകൂര്‍ രാജവംശത്തിലെ അവസാനത്തെ മഹാരാജാവായ ചിത്തിര തിരുന്നാള്‍ ബാലരാമവര്‍മ്മ ഈ മത്സരം കാണാനായി എത്തിയിരുന്നു. അദ്ദേഹം തുടങ്ങി വച്ച രാജപ്രമുഖന്‍ ട്രോഫി നേടാനായി പ്രമുഖ ചുണ്ടന്‍ വള്ളങ്ങളും ബോട്ട്‌ ക്ലബ്ബുകളും ചമ്പക്കുളം നദിയില്‍ ഇന്നും മത്സരിക്കുന്നു.

കൂടുതൽ വായിക്കുക
കുമരകം ശ്രീ നാരായണഗുരു ജയന്തി വള്ളംകളി

കുമരകം സന്ദര്‍ശിച്ച കേരളത്തിന്റെ നവോത്ഥാന നായകനും ആദ്ധ്യാത്മിക മാര്‍ഗ്ഗോപദേശകനുമായ ശ്രീനാരായണ ഗുരുവിന്റെ ബഹുമാനാര്‍ത്ഥമാണ്‌ എല്ലാ വര്‍ഷവും കുമരകം ശ്രീനാരായണഗുരു ജയന്തി വള്ളംകളി സംഘടിപ്പിക്കുന്നത്‌. വലിയ ഒരു ഘോഷയാത്രയുടെ അകമ്പടിയോടെയാണ്‌ 1903-ല്‍ ആലപ്പുഴയില്‍ നിന്നും കുമരകത്തേക്ക്‌ ഗുരുവിനെ ആനയിച്ചത്‌. അന്ന്‌ അദ്ദേഹം ശ്രീ കുമാരകമംഗലം ക്ഷേത്രത്തിലേക്ക്‌ ഭഗവാന്‍ സുബ്രഹ്‌മണ്യന്റെ ഒരു ചിത്രം സമര്‍പ്പിക്കുകയുണ്ടായി. ആ സംഭവത്തിനു ശേഷം 1903 മുതല്‍ എല്ലാ വര്‍ഷവും കുമരകം വള്ളംകളി സംഘടിപ്പിക്കുന്നത്‌ ആ സന്ദര്‍ശനത്തിന്റെ ഓര്‍മ്മ പുതുക്കലായിട്ടാണ്‌. എന്നാല്‍ ഒരു മത്സരമായി ഇതു മാറിയത്‌ 1952 മുതലായിരുന്നു. കൊട്ടത്തോടിലെ 900 മീറ്റര്‍ നീളമുള്ളതാണ്‌ ഇവിടുത്തെ മത്സരപ്പാത. നാരായണ ഗുരുവിന്റെ ചിത്രവും സുബ്രഹ്‌മണ്യന്റെ പ്രതിമയും വഹിച്ചു കൊണ്ട്‌ നടത്തുന്ന വന്‍ഘോഷയാത്രയോടെയാണ്‌ മത്സരം ആരംഭിക്കുന്നത്‌. ചുണ്ടന്‍ വള്ളങ്ങളേക്കാള്‍ ഇരുട്ടുകുത്തി വള്ളങ്ങള്‍ക്കാണ്‌ ഇവിടെ പ്രാധാന്യം. തുഴച്ചിലില്‍ അതിവിദഗ്‌ധരായ ആയിരത്തിലധികം തുഴക്കാര്‍ ഇതില്‍ പങ്കെടുക്കുന്നു.

കൂടുതൽ വായിക്കുക
പായിപ്പാട് വള്ളംകളി

കേരളത്തിലെ ജലോത്സവങ്ങളില്‍ വളരെ പ്രധാനപ്പെട്ട ഒന്നാണ്‌ പായിപ്പാട്‌ വള്ളംകളി. കേരളത്തിനു മാത്രം സാദ്ധ്യമാകുന്ന മത-സാംസ്‌കാരിക-കായിക മേഖലകളുടെ ഒരു സമന്വയമാണ്‌ മൂന്നു ദിവസം നീണ്ടു നില്‌ക്കുന്ന ഈ പായിപ്പാട്‌ വള്ളംകളി. ആലപ്പുഴ ജില്ലയിലെ പായിപ്പാട്‌ ഗ്രാമത്തിലുള്ള അച്ചന്‍ കോവിലാറില്‍ നടക്കുന്ന ഈ മത്സരം തിരുവിതാംകൂര്‍ ദേവസ്വം ബോര്‍ഡാണ്‌ സംഘടിപ്പിക്കുന്നത്‌. പല ജലോത്സവങ്ങളുടെയും പിന്നിലുള്ളതു പോലെ പായിപ്പാട്‌ വള്ളംകളിയുടെ പിന്നിലും രസകരമായ ഒരു കഥയുണ്ട്‌. കായംകുളം കായലിലെ ഒരു ചുഴിക്കുള്ളില്‍ ഭഗവാന്‍ സുബ്രഹ്‌മണ്യന്റെ പ്രതിമ കിടക്കുന്നതായി ഹരിപ്പാട്‌ കീഴ്‌തൃക്കോവില്‍ ക്ഷേത്രത്തിലെ പൂജാരി സ്വപ്‌നം കാണുകയും അവിടെ നടത്തിയ അന്വേഷണത്തില്‍ വിഗ്രഹം കണ്ടെടുത്ത്‌ ഹരിപ്പാട്‌ ക്ഷേത്രത്തിലേക്ക്‌ സമര്‍പ്പിക്കുകയും ചെയ്‌തു. വിഗ്രഹവുമായി ഹരിപ്പാട്ടേക്കു നടത്തിയ ഘോഷയാത്രയെ വഴിയില്‍ വെച്ച്‌ പായിപ്പാട്‌ ഗ്രാമക്കാര്‍ സ്വീകരിച്ചു. ഹരിപ്പാട്‌ ക്ഷേത്രത്തിന്റെ നവീകരണ ജോലികള്‍ പൂര്‍ത്തിയാകും വരെ പായിപ്പാട്ടെ അരനാഴിക നെല്‍പ്പുരക്കടവിലാണ്‌ വിഗ്രഹം സൂക്ഷിച്ചിരുന്നത്‌. ഹരിപ്പാട്ടെ ക്ഷേത്ര നവീകരണം പൂര്‍ത്തിയായപ്പോള്‍ വിഗ്രഹം അവിടെ പ്രതിഷ്‌ഠിക്കുകയും ചെയ്‌തു. ഈ സംഭവത്തിന്റെ സ്‌മരണാര്‍ത്ഥമാണ്‌ പായിപ്പാട്ടു വള്ളംകളി നടത്തുന്നത്‌. തിരുവോണ ദിവസം അരനാഴിക നെല്‍പ്പുരക്കടവു മുതല്‍ ഹരിപ്പാട്‌ ക്ഷേത്രം വരെയാണ്‌ ചുണ്ടന്‍ വള്ളങ്ങളുടെ മത്സരം. വഞ്ചിപ്പാട്ടുമായുള്ള വള്ളംകളിയുടെ തുടക്കം ഉച്ചയ്‌ക്കു ശേഷമാണ്‌. അടുത്ത ദിവസം - അവിട്ടം നാള്‍ - നിറപ്പകിട്ടാര്‍ന്ന ജലഘോഷയാത്രയാണ്‌. ആകാംക്ഷാഭരിതമായ അവസാന മത്സരം മൂന്നാം ദിവസം - ചതയം നാള്‍ - കൊണ്ടാടുന്നു. മത്സരത്തില്‍ ചുണ്ടന്‍ വള്ളങ്ങളോടൊപ്പം ഇരുട്ടുകുത്തി, വെപ്പ്‌ (Veppu), ചുരുളന്‍ തുടങ്ങിയവയും പങ്കെടുക്കും.

കൂടുതൽ വായിക്കുക
നീരേറ്റുപുറം വള്ളംകളി

എല്ലാ വര്‍ഷവും തിരുവോണ ദിവസം നടക്കുന്ന മറ്റൊരു വള്ളംകളിയാണ്‌ ഉത്രാടം തിരുനാള്‍ നീരേറ്റുപുറം വള്ളംകളി. 1957-ല്‍ നീരേറ്റുപുറം ലൈബ്രറി ആന്റ്‌ യൂണിയന്‍ ലൈബ്രറിയിലെ ഒരു സംഘം യുവാക്കളാണ്‌ ഈ വള്ളംകളി ആരംഭിച്ചത്‌. പമ്പാ നദിയില്‍ നടക്കുന്നതിനാല്‍ പമ്പാ ജലോത്സവം എന്നും ഈ മത്സരം അറിയപ്പെടുന്നു. നീരേറ്റുപുറം വാട്ടര്‍ സ്റ്റേഡിയത്തില്‍ ഒരു കിലോമീറ്റര്‍ നീളത്തിലാണ്‌ മത്സരപ്പാത. മറ്റു മത്സരങ്ങളില്‍ നിന്നും വ്യത്യസ്‌തമായി രണ്ടു ജില്ലകളുടെ അതിര്‍ത്തിയിലാണ്‌ - പത്തനംതിട്ട, ആലപ്പുഴ - ഈ മത്സരം നടക്കുന്നത്‌. മത്സരപ്പാതയുടെ വടക്കും കിഴക്കും ഭാഗങ്ങള്‍ പത്തനംതിട്ട ജില്ലയിലും തെക്കും പടിഞ്ഞാറും ഭാഗങ്ങള്‍ ആലപ്പുഴ ജില്ലയിലുമാണ്‌. ഈ മത്സരപ്പാതയുടെ വീതി കുറവായതിനാല്‍ ഒരേ സമയത്ത്‌ മൂന്നു ചുണ്ടന്‍ വള്ളങ്ങള്‍ക്കു മാത്രമേ മത്സരിക്കാന്‍ സാധിക്കൂ. അതിനാല്‍ ആദ്യകാലങ്ങളില്‍, ഇവിടുത്തെ പുലിക്കീഴ്‌ (Pulikeezu) പമ്പ ഷുഗര്‍ ഫാക്ടറി ട്രോഫിക്കായി വെപ്പു വള്ളങ്ങള്‍ മാത്രമേ മത്സരിച്ചിരുന്നുള്ളൂ. പിന്നീടാണ്‌ ചുണ്ടന്‍ വള്ളങ്ങളും മത്സരത്തില്‍ പങ്കെടുക്കാനെത്തിയത്‌. ഇന്ന്‌ മലയാള മനോരമ ഗ്രൂപ്പിന്റെ മാമ്മന്‍ മാപ്പിള ട്രോഫിക്കായി എല്ലാത്തരം വള്ളങ്ങളും ഇവിടെ മാറ്റുരയ്‌ക്കുന്നു. കുട്ടനാട്ടിലെ കര്‍ഷകര്‍ 1957-ല്‍ തുടങ്ങിയ പമ്പ റേസ്‌ ക്ലബ്ബ്‌ ആണ്‌ ഈ മത്സരത്തിന്റെ ചുമതല വഹിക്കുന്നത്‌.

കൂടുതൽ വായിക്കുക
കണ്ടശ്ശാംകടവ്‌ വള്ളംകളി

തൃശ്ശൂര്‍ ജില്ലയിലെ പഴക്കമേറിയ വള്ളംകളി മത്സരങ്ങളില്‍ ഒന്നാണ്‌ കണ്ടശ്ശാംകടവ്‌ വള്ളംകളി. തിരുവോണ നാള്‍ നടക്കുന്ന ഈ മത്സരം കനോലി കനാലില്‍ വച്ചാണ്‌. 1956-ല്‍ കേരളപ്പിറവി ആഘോഷങ്ങളുമായി ബന്ധപ്പെട്ടാണ്‌ ഈ വള്ളംകളി ആരംഭിക്കുന്നത്‌. ആദ്യത്തേത്‌ രണ്ടു ചുരുളന്‍ വള്ളങ്ങള്‍ മാത്രം മത്സരിച്ച ഒരു പ്രദര്‍ശന മത്സരം മാത്രമായിരുന്നു. പിന്നീട്‌ ചെറിയ ഇടവേളകള്‍ ഈ മത്സരത്തിനുണ്ടായി. 1962-ല്‍ ഓണാഘോഷവുമായി ബന്ധപ്പെട്ടാണ്‌ അടുത്ത വള്ളംകളി സംഘടിപ്പിച്ചത്‌. ഈ മത്സരം 1968 വരെ തുടര്‍ന്നു. 1977-ല്‍ കുറച്ചു സംഘാടകര്‍ ചേര്‍ന്ന്‌ ഇതിനൊരു പുതുജീവന്‍ നല്‍കുകയും 1990 വരെ മത്സരം തുടര്‍ന്നു കൊണ്ടു പോകാന്‍ സാധിക്കുകയും ചെയ്‌തു. പക്ഷെ പിന്നീട്‌ വിസ്‌മൃതിയിലേക്കു പോയ ഈ വള്ളംകളിയെ മണലൂര്‍ ഗ്രാമപഞ്ചായത്തും തൃശ്ശൂര്‍ ജില്ലാ ടൂറിസം പ്രൊമോഷന്‍ കൗണ്‍സിലും (DTPC) ചേര്‍ന്ന്‌ പുനര്‍ജീവിപ്പിച്ചു. ഇന്ന്‌ 10 ദിവസത്തെ ഓണാഘോഷങ്ങളില്‍ ഉള്‍പ്പെടുത്തിയാണ്‌ കണ്ടശ്ശാംകടവ്‌ ജലോത്സവം നടത്തുന്നത്‌. പുലം (Pulam) പുഴക്കടവു മുതല്‍ കണ്ടശ്ശാംകടവ്‌ ബോട്ടു ജെട്ടി വരെ 990 മീറ്റര്‍ നീളത്തിലാണ്‌ മത്സരവീഥി. ചീഫ്‌ മിനിസ്റ്റേഴ്‌സ്‌ എവര്‍ റോളിങ്‌ ട്രോഫിയ്‌ക്കായി പ്രധാന ചുണ്ടന്‍ വള്ളങ്ങളും ക്ലബ്ബുകളും ഇവിടെ മത്സരിക്കുന്നു.

കൂടുതൽ വായിക്കുക
മഹാത്മാ മാന്നാര്‍ വള്ളംകളി

എല്ലാ വര്‍ഷവും ആലപ്പുഴ ജില്ലയിലെ മാന്നാറില്‍ നടക്കുന്ന ജലോത്സവമാണ്‌ മഹാത്മാ മാന്നാര്‍ വള്ളംകളി. 1971-ല്‍ ആരംഭിച്ച മത്സരത്തിന്‌ രാഷ്ട്രപിതാവ്‌ മഹാത്മാ ഗാന്ധിയില്‍ നിന്നാണ്‌ പേരു കണ്ടെത്തിയത്‌. ചിങ്ങമാസത്തിലെ നാലാം ഓണത്തിനാണ്‌ - ചതയം നാള്‍ - ഈ ജലോത്സവം കൊണ്ടാടുക.പമ്പാനദിയുടെ ഭാഗമായ നെട്ടയം നദിയിലെ മത്സരപ്പാതയ്‌ക്ക്‌ ഒരു കിലോ മീറ്റര്‍ നീളവും 100 മീറ്റര്‍ വീതിയുമാണുള്ളത്‌. ഇവിടുത്തെ ശക്തമായ അടിയൊഴുക്ക്‌ പങ്കെടുക്കുന്നവര്‍ക്കുള്ള വെല്ലു വിളിയാണ്‌. പടിഞ്ഞാറു നിന്നും കിഴക്കോട്ടു തുഴയുന്ന ഈ മത്സരത്തില്‍ എല്ലാ വിധത്തിലുമുള്ള വള്ളങ്ങളും പങ്കെടുക്കുന്നുണ്ട്‌. ഈ ജലോത്സവത്തിന്റെ ചുമതല വഹിക്കുന്നത്‌ മാന്നാര്‍ ബോട്ട്‌ റേസ്‌ കമ്മറ്റിയാണ്‌.ഈ മത്സരത്തിന്‌ പ്രധാന പങ്കു വഹിച്ച മാന്നാര്‍ അരികുപുറം കുടുംബത്തിലെ എ.സി.തോമസിന്റെ ഓര്‍മ്മയ്‌ക്കായാണ്‌ വിജയികള്‍ക്കുള്ള ട്രോഫി സമര്‍പ്പിച്ചിരിക്കുന്നത്‌.

കൂടുതൽ വായിക്കുക
പൊന്നാനി വള്ളംകളി

വടക്കന്‍ കേരളത്തിലെ പ്രധാനപ്പെട്ട വള്ളംകളി മത്സരമാണ്‌ പൊന്നാനി വള്ളംകളി. മലപ്പുറം ജില്ലയിലെ പൊന്നാനിക്കാര്‍ ഇതിനെ മലബാറിന്റെ ജലോത്സവം എന്നാണു വിളിക്കുന്നത്‌. ഓണാഘോഷവുമായി ബന്ധപ്പെട്ടു നടത്തുന്ന ഈ മത്സരത്തില്‍ നാടന്‍ വള്ളങ്ങളാണ്‌ പങ്കെടുക്കുന്നത്‌. മുമ്പ്‌ പൂക്കൈത കടവില്‍ നടത്തി വന്ന ഈ മത്സരം 1983 മുതല്‍ പ്രകൃതി സൗന്ദര്യത്തിനും ജലകായികോത്സവത്തിനും യോജിച്ച ബിയ്യം കായലിലാണ്‌ നടക്കുന്നത്‌. ഈ വള്ളംകളിയും സി.ബി.എല്ലില്‍ ഉള്‍പ്പെടുത്തിയിട്ടുണ്ട്‌.

കൂടുതൽ വായിക്കുക
Click here to go to the top of the page